Kynbótasýningar 2016

Kolka frá Hákoti og Hrefna María Ómarsd/eidfaxi.is

Nú er búið að stilla upp áætlun fyrir kynbótasýningar árið 2016. Ákveðið hefur verið að stilla ekki upp sýningum þar sem tvö dómaragengi eru að störfum en þörf hefur verið á því á suðvesturhorni landsins til að anna eftirspurn. Þess í stað verður boðið upp á sýningar á fleiri sýningarsvæðum á sama tíma.

Sýningaáætlun 2016:

• 17.05 - 20.05 Hafnarfjörður
• 23.05 - 27.05 Eyjafjörður
• 25.05 - 27.05 Fljótsdalshérað
• 23.05 - 27.05 Selfoss
• 30.05 - 03.06 Borgarfjörður
• 30.05 - 10.06 Sprettur
• 30.05 - 10.06 Gaddstaðaflatir
• 06.06 - 10.06 Skagafjörður

• 27.06 - 03.07 Landsmót að Hólum

• 25.07 - 29.07 Miðsumarssýning Skagafjörður
• 25.07 - 29.07 Miðsumarssýning Selfoss

• 15.08 - 19.08 Síðsumarssýning Gaddstaðaflatir
• 15.08 - 19.08 Síðsumarssýning Borgarfjörður
• 15.08 - 19.08 Síðsumarssýning Eyjafjörður

Landsmót verður haldið að Hólum í Hjaltadal í ár. Að undangenginni umræðu í haust hefur fagráð í hrossarækt ákveðið að hverfa frá einkunnalágmörkum sem hafa ákvarðað þátttökurétt kynbótahrossa á undanförnum mótum. Þess í stað verður ákveðinn fjöldi efstu hrossa sem vinnur sér þátttökurétt á mótinu og miðað er við að hafa 165 kynbótahross á mótinu. Fjöldann í hverjum flokki má sjá í töflu hér að neðan. Til að auðvelda bestu klárhrossum landsins að komast inn á mótið verður 10 stigum bætt við aðaleinkunn klárhrossa í sætisröðun hrossa inn á mótið. Þetta er í raun sama leið og var farin fyrir síðasta landsmót þegar lágmörk inn á það mót voru 10 stigum lægri fyrir klárhross en alhliða hross. Þegar kynbótasýningar byrja næsta vor verður birtur stöðulisti í WorldFeng sem sýnir hvaða hross eru inni á mótinu hverju sinni. Ef fjöldi hrossa í hverjum flokki er skoðaður í töflunni má sjá að hlutfall yngstu hrossanna (fjögurra og fimm vetra) er hærra en á síðasta móti en mest er fækkun hrossa í elstu flokkum. Til dæmis heldur fjöldi fjögurra vetra hrossa sér nánast en á síðasta móti voru 22 fjögurra vetra hryssur og fjögurra vetra hestar voru 16. Ef fleiri en eitt hross eru jöfn í síðasta sæti inn á mótið (til dæmis fleiri en ein hryssa í 15. sæti í flokki 7 vetra og eldri hryssna) þá er þeim öllum heimil þátttaka á mótinu. Eins verða eigendur hrossa sem vinna sér þátttökurétt á mótinu en ætla sér ekki að mæta með þau af einhverjum ástæðum beðnir um að láta vita fyrir ákveðna dagsetningu, þannig að hægt sé að bjóða hrossum sem eru neðar á listanum þátttöku á mótinu. Þá er hugmyndin að hafa úrvalssýningu kynbótahrossa á mótinu og bjóða þeim hrossum sem vinna sér ekki þátttökurétt á mótinu en búa yfir sérstökum úrvalseiginleikum þátttöku í þeirri sýningu. Nánari útfærsla á þessari hugmynd verður kynnt síðar.

Tekið af vef rml.is