63. Landsþing Landssambands Hestamannafélaga fór fram um liðna helgi, 4.-5. nóvember 2022. Rétt til þingsetu áttu 173 fulltrúar frá 40 aðildarfélögum LH en þingið sóttu 157 þingfulltrúar.
Landsþingið var að þessu sinni haldið í Víðidal af Hestamannafélaginu Fáki í Reykjavík, en Fákur á 100 ára afmæli á þessu ári og því vel við hæfi að Fáksmenn væru gestgjafar landsþingsins.
Dagskrá þingsins var nokkuð hefðbundin, en fjöldi mála lá fyrir þinginu að taka afstöðu til ásamt því að kjósa sér stjórn til næstu tveggja ára.
Í upphafi þings voru ávörp heiðursgesta flutt, en það voru Gunnar Sturluson forseti FEIF, Sveinn Steinarsson formaður Deildar hrossabænda og Viðar Garðarsson stjórnarmaður Íþrótta- og ólympíusamands Íslands sem fluttu ávörp ásamt Ásmundi Einari Daðasyni ráðherra mennta- og barnamála sem afhenti æskulýðsbikar LH. Þá var látinna félaga minnst og nokkrar viðurkenningar veittar.
Fulltrúi Landsmóts á Rangárbökkum 2022 flutti samantekt eftir landsmótið síðastliðið sumar sem kom vel út, og ljóst að framkvæmdaraðilar mótsins geta borið höfuðið hátt eftir vel heppnað mót sem var rekið með miklum myndarbrag. Þar á eftir kynnti verkefnisstjóri Horses of Iceland þeirra vinnu og samstarfið við LH og önnur samtök.
Guðni Halldórsson formaður LH flutti skýrslu stjórnar og flutti einnig ræðu formanns LH þar sem hann fór um víðan völl um starf sitt á persónulegum nótum og það sem hann hefur upplifað síðastliðið kjörtímabil sem var hans fyrsta í starfi.
Þar að auki var svo farið yfir ársreikninga LH, fjárhagsáætlun næstu tveggja ára og reikninga eignarhaldsfélaga sambandsins sem eru Landsmót ehf. og Skógarhólar ehf.
Þessi gögn er hægt að kynna sér og skoða öll á www.lhhestar.is.
Eins og fram kom hér að ofan voru margar tillögur sem lágu fyrir til afgreiðslu á þinginu að þessu sinni, en helst er þar að nefna nýja uppsetningu á regluverkinu í heild sinni og gagngerar endurbætur á lögum LH í takt við lög annarra sérsambanda ÍSÍ. Uppsetningin hefur verið færð til samræmis við lög og reglur FEIF, alþjóðasamtaka íslenska hestsins. Með þessari aðgerð sem samþykkt var á þinginu, er regluverk Landssambands hestamannafélaga orðið mun aðgengilegra og búið að hreinsa verulega til í regluverkinu og færa það til betri vegar.
Í nefndarstörfum þingsins sem fram fóru á föstudagskvöldinu hafði allsherjarnefndin úr miklum upplýsingum að vinna þegar fjallað var um tillögur um breytingu á lögum og reglum sambandsins.
Að auki við allsherjarnefnd voru það keppnisnefnd, reiðveganefnd, fjárlaganefnd og æskulýðsnefnd sem tóku til starfa og fjölluðu um málefni og tillögur úr viðeigandi málaflokkum og afgreiddu álit nefnda á tillögum sem svo voru bornar fram fyrir þingið á laugardegi.
Dagskrá laugardagsins stýrðist fyrst og fremst af þingfundum sem stóðu lengi fram eftir degi enda fjöldi mála sem kjósa þurfti um, og fjöldi tillagna á þinginu var slíkur að mörgum þótti nóg um þegar hæst lét.
Kosning um tillögu keppnisnefndar LH vegna Íslandsmóts var svo tvísýn að eftir tvær talningar á atkvæðum í salnum, sem skiluðu mismunandi niðurstöðum, var brugðið á það ráð að telja þingfulltrúa út úr húsi til þess að hægt væri að skera úr um niðurstöðu kosningarinnar.
Eftir að tillaga keppnisnefndar LH um Íslandsmót var felld á þinginu með minnsta mögulega mun þurfti að kalla keppnisnefnd þingsins til starfa að nýju til þess að afgreiða álit og fjalla um tvær tillögur að Íslandsmótum hennar í stað, og fór kosning fram síðar um daginn.
Ný Íslandsmótstillaga var svo samþykkt, þar sem helstu breytingar frá fyrra ári eru að stöðulistar inn á mótið falla úr gildi og þeirra í stað verður lágmarkseinkunn í öllum greinum, föst dagsetning mótsins var tekin út og ný keppnisgrein í fimi sett inn í greinar Íslandsmóts yngri flokka.
Fimikeppni, sem hefur gengið undir nafninu Gæðingafimi LH, hefur nú verið samþykkt undir regluverki LH, og efnt verður til nafnasamkeppni um nafn á greinina til framtíðar.
Eftir þingfund laugardagsins var kynning frambjóðenda til stjórnar, en kosið var í aðalstjórn og varastjórn LH til næstu tveggja ára. Guðni Halldórsson var einn í framboði til formanns, og var því ekki kosið um formann að þessu sinni, en í framboði til aðastjórnar voru hvorki meira né minna en 12 manns í framboði um þau 6 stjórnarsæti sem skipuð eru auk formannsins. Til varastjórnar voru 9 manns í framboði um 5 sæti sem skipuð eru.
Stjórn LH 2022-2024 skipa:
- Guðni Halldórsson formaður, Hestamannafélagið Hörður
- Edda Rún Ragnarsdóttir, Hestamannafélagið Fákur
- Ólafur Gunnarsson, Hestamannafélagið Jökull
- Hákon Hákonarson, Hestamannafélagið Hörður
- Þórhildur Katrín Stefánsdóttir, Hestamannafélagið Hornfirðingur
- Unnur Rún Sigurpálsdóttir, Hestamannafélagið Skagfirðingur
- Sóley Margeirsdóttir, Hestamannafélagið Geysir
Varastjórn LH 2022-2024
- Gróa Björg Baldvinsdóttir, Hestamannafélagið Fákur
- Randi Holaker, Hestamannafélagið Borgfirðingur
- Sveinn Heiðar Jóhannesson, Hestamannafélagið Sörli
- Birna Tryggvadóttir, Hestamannafélagið Léttir
- Valdimar Magnús Ólafsson, Hestamannafélagið Dreyri
63. landsþing Landssambands Hestamannafélaga var í heildina vel heppnað og gott þing þar sem mikið var rætt og gert. Umræðan var þó í þá áttina að tíminn sem færi í að lagfæra orðalag í reglugerðum, breyta smáatriðum og fínstilla væri of mikill, og mögulega á kostnað uppbyggilegrar umræðu um stór mál til framtíðar, eins og nýliðunarmál, æskulýðsmál og stefnumótun.
Á móti má segja að nú sé búið að gera heilmikla tiltekt í lögum og reglum, koma þeim í góðan farveg og stjórn LH komin með heimild til þess að lagfæra slík atriði á milli þinga í stað þess að eyða dýrmætum tíma þingheims í umræður um orðalag í einstökum reglugerðum, og því eru allar forsendur fyrir breyttu verklagi í þá áttina á næstu ársþingum.
Landssamband hestamannafélaga þakkar Hestamannafélaginu Fáki gestrisnina á þinginu. Stjórn og starfsmenn LH þakka þingfulltrúum kærlega fyrir gott landsþing, og halda inn í nýtt kjörtímabil með kraft og von í brjósti um góð ár framundan í hestamennskunni á Íslandi.
