Siggi hélt Suðra á toppnum

Sigurður Sigurðarson á Suðra frá Holtsmúla varð efstur í fjórgangi á öðru móti Meistaradeildar VÍS í gærkvöldi. Sigurður sigraði einnig í þessari grein í fyrra, þá á Yl frá Akranesi. Sigurður Sigurðarson á Suðra frá Holtsmúla varð efstur í fjórgangi á öðru móti Meistaradeildar VÍS í gærkvöldi. Sigurður sigraði einnig í þessari grein í fyrra, þá á Yl frá Akranesi. Suðri hefur þrisvar sinnum orðið Íslandsmeistari í fjórgangi, undir hnakk hjá hinni snjöllu reiðkonu Olil Amble. Það var því nokkur eftirvænting hjá áhorfendum að sjá hvernig Sigurður höndlaði verkefnið. Ekki leit það vel út í forkeppni. Suðri var ósáttur, einkum á tölti, og gangskiptingar óöruggar. Þeir félagar komust þó í A úrslit.

En það var annað uppi á teningnum í úrslitunum. Enda Sigurður þar jafnan í essinu sínu. Það er greinilegt að Sigurður hefur lagt mikið upp úr því að breyta stillingu hestsins á tölti – og honum virðist vera að takast það. Abstrakt brokkið hans Suðra var á sínum stað, og fékk hann 9,0 fyrir það hjá öllum dómurum í úrslitum. Það fór svo að Sigurður stóð uppi sem sigurvegari í lokin, með sjö stiga forskot á næsta keppanda, Jakob Sigurðsson á Auði frá Lundum. Báðir eru þeir í liði Skúfslækjar.

Nýjir hestar og knapar létu að sér kveða í A úrslitum í fjórgangi. Daníel Jónsson hafnaði í fimmta sæti á Tóni frá Ólafsbergi. Þess má geta að Tónn er með 9,0 fyrir skeið, þannig að samkvæmt þessari frammistöðu ættu þeir félagar að geta gert ágæta hluti í fimmgangi. Daníel sýndi á sannfærandi hátt að færni hans er ekki bundin við kynbótabrautina. Framúrskarandi góður reiðmaður Daníel, hesturinn mjúkur og framsækinn.





Hinn ungi Klerkur frá Bjarnanesi, sex vetra stóðhestur, stóð sig vel hjá Eyjólfi Þorsteinssyni. Klerkur sló í gegn á FM2007 á Iðavöllum en náði sér ekki á strik á sýningum í fyrra. Hann er nú á uppleið aftur og kunnu áhorfendur greinilega að meta hans mikla og ýkta fótaburð.

Annar stóðhestur vakti verulega athygli. Það var Náttar frá Þorláksstöðum, knapi Hinrik Bragason. Hinrik hafnaði í B úrslitum eftir forkeppni, vann hana og deildi öðru til þriðja sæti í lokin ásamt Jakobi og Auði. Náttar er stórglæsilegur stóðhestur, tinnusvartur og höfðinglegur. Gangtegundir hans bjóða auk þess upp á mikla möguleika í íþróttakeppni. Reiðmennska Hinriks eins og ævinlega, í senn fáguð og krefjandi. Snjall reiðmaður.


Úrslit:

1 Sigurður Sigurðarson Skúfslækur Suðri frá Holtsmúla 7,80

2 Jakob S Sigurðsson Skúfslækur Auður frá Lundum 7,73

2 Hinrik Bragason Hestvit Náttar frá Þorláksstöðum 7,67

4 Hulda Gústafsdóttir Hestvit Kjuði frá Kirkjuferjuhjáleigu 7,20

5 Daníel Jónsson Top Reiter Tónn frá Ólafsbergi 7,17

6 Eyjólfur Þorsteinsson Málning Klerkur frá Bjarnanesi 1 7,13