Úrslit Íslandsmóts í hestaíþróttum 2021

Árni Björn Pálsson og Ljúfur frá Torfunesi. Mynd: Eiðfaxi.

Íslandsmót í hestaíþróttum 2021 fór fram á Hólum í Hjaltadal dagana 30. júní til 4. júlí. Mótið þótti heppnast vel í alla staði í blíðskaparveðri og Hjaltadalurinn skartaði sínu fegursta.

Íslandsmeistari í fjórgangi varð Jóhanna Margrét Snorradóttir á hestinum Bárði frá Melabergi með einkunnina 8,07. Jóhanna Margrét er úr Hestamannafélaginu Mána. Efstur inn í úrslit var Jakob Svavar Sigurðsson úr Hestamannafélaginu Dreyra, á hestinum Hálfmána frá Steinsholti, en þeir urðu að hætta keppni í úrslitum þegar ístaðsól slitnaði.

Úrslit í fjórgangi fóru þannig:

Íslandsmeistari í fimmgangi varð Eyrún Ýr Pálsdóttir úr Hestamannafélaginu Skagfirðingi á hestinum Hrannari frá Flugumýri, með einkunnina 7,95. Eyrún Ýr og Hrannar hafa áður unnið stóra sigra á Hólum, sínum heimavelli, en fyrir nákvæmlega fimm árum unnu þau A-flokk á Landsmóti á Hólum. Efstur eftir forkeppni var Árni Björn Pálsson og Katla frá Hemlu II með einkunnina 7,73.

Úrslit í fimmgangi fóru þannig:

Íslandsmeistari í slaktaumatölti varð Jakob Svavar Sigurðsson úr Hestamannafélaginu Dreyra, á hestinum Kopar frá Fákshólum með einkunnina 8,42. Jakob og Kopar fóru lengri leiðina að sigrinum því þeir unnu sig upp úr b-úrslitum og fengu þar einkunnina 8,71. Aðalheiður Anna Guðjónsdóttir úr Hestamannafélaginu Herði var efst eftir forkeppni með einkunnina 8,63, á hestinum Óskari frá Breiðstöðum en þau urðu að hætta keppni í úrslitum þegar Óskar missti skeifu.

Úrslit í slaktaumatölti fóru þannig:

Mótinu lauk með úrslitum í tölti þar sem Árni Björn Pálsson og Ljúfur frá Torfunesi fóru með sigur af hólmi. Árni Björn er úr Hestamannafélaginu Fáki og hlutu þeir einkunnina 9,44 í úrslitum og er það með hærri einkunnum sem gefin hefur verið í tölti. Þeir félagar voru einnig efstir eftir forkeppni með einkunnina 9,13.

Úrslit í tölti fóru þannig:

Íslandsmeistari í samanlögðum fjórgangsgreinum varð Jakob Svavar Sigurðsson á hestinum Hálfmána frá Steinsholti en þann titil hlýtur par sem er með hæstu samanlagða einkunn úr forkeppni í fjórgangi og tölti eða slaktaumatölti.

Íslandsmeistari í samanlögðum fimmgangsgreinum varð Haukur Baldvinsson á hestinum Sölva frá Stuðlum en þann titil hlýtur par sem er með hæstu samanlagða einkunn úr forkeppni í fimmgangi, einni töltgrein og einni skeiðgrein.

Íslandsmót ungmenna fór fram samhliða Íslandsmóti fullorðinna. Sá háttur er hafður á að fulllorðnir og ungmenni ríða forkeppni saman en svo eru sérstök úrslit fyrir hvorn aldursflokk.

Í ungmennaflokki varð Glódís Rún Sigurðardóttir þrefaldur Íslandsmeistari á hestinum Glymjanda frá Íbishóli með einkunnina 7,33. Glódís er úr Hestamannafélaginu Sleipni. Þau Glódís og Glymjandi urðu Íslandsmeistarar í fjórgangi með 7,10, slaktaumatölti með 7,67 og einnig í samanlagðum fjórgangsgreinum.

Úrslit í fjórgangi ungmenna fóru þannig:

Úrslit í slaktaumatölti ungmenna fóru þannig:

Íslandsmeistari ungmenna í fimmgangi varð Hafþór Hreiðar Birgisson úr Hestamannafélaginu Spretti á hestinum Verði frá Vindási með einkunnina 7,24. Eftir forkeppni voru Gyða Sveinbjörg Kristinsdóttir og Vísir frá Helgatúni efst með einkunnina 6,57.

Úrslit í fimmgangi ungmenna fóru þannig:

Íslandsmeistari ungmenna í tölti varð Guðmar Freyr Magnússon úr hestamannafélaginu Skagfirðingi á hestinum Sigursteini frá Íbishóli með einkunnina 7,78 og voru þeir einnig efstir eftir forkeppni. Guðmar Freyr varð fyrir því óhappi fyrr í mánuðinum að fótbrotna en hann lét það ekki halda aftur af sér og reið til sigurs í tölti.

Úrslit í tölti ungmenna fóru þannig:

Samanlagður sigurvegari í fimmgangsgreinum varð Hákon Dan Ólafsson á hryssunni Júlíu frá Syðri-Reykjum.

Í skeiðgreinum fóru leikar þannig að í 250 m. skeiði urðu Konráð Valur Sveinsson úr Hestamannafélaginu Fáki og Kjarkur frá Árbæjarháleigu Íslandsmeistarar á tímanum 21,65 sek. Í 150 m. skeiði urðu Íslandsmeistarar í flokki fullorðinna Þórarinn Ragnarsson úr Hestamannafélaginu Smára og Bína frá Vatnsholti á tímanum 14,07 sek og í ungmennaflokki Glódís Rún Sigurðardóttir úr hestamannafélaginu Sleipni og Blikka frá Þóroddsstöðum á 14,94 sek. Í 100 m. skeiði urðu nokkuð óvænt úrslit en í fullorðinsflokki sigruðu Benjamín Sandur Ingólfsson úr Hestamannafélaginu Fáki og Fáfnir frá Efri-Rauðalæk á tímanum 7,25 sek og í ungmennaflokki sigraði Sigríður Ingibjörg Einarsdóttir úr Hestamannafélaginu Sindra á hestinum Ylfu frá Miðengi á tímanum 7,71 sek.

Í gæðingaskeiði urðu jafnir í fyrsta sæti í flokki fullorðinna Elvar Þormarsson úr Hestamannafélaginu Geysi á hryssunni Fjalladís frá Fornusöndum  og Konráð Valur Sveinsson og Tangó frá Litla-Garði með einkunnina 8,25 og í ungmennaflokki sigraði Benedikt Ólafsson á Leiru-Björk frá Naustum III með einkunnina 7,71 (uppfært 12. júlí).