Guðmundur Einarsson Norðurlandameistari í 250 m skeiði

Guðmundur Einarsson á Sprota frá Sjávarborg er Norðurlandameistari í 250 m skeiði á NM2008. Sproti hljóp á 22,05 sekúndum í þriðja spretti, átti 22,15 frá því í gær. Guðmundur hleypti Sprota nær niðurtökulínunni í þetta sinnið, enda nær öruggur með sigur. Það skilaði honum nokkrum sekúndubrotum. Hann fékk líka góðan stuðning frá Malu Logan, sem hleypti með honum í sprettinum.

Kolbeinn frá Þóroddsstöðum lá hins vegar ekki hjá Sigurði Óskarssyni í dag frekar en í gær. Hann fór einn báða sprettina, en allt kom fyrir ekki. Í seinni sprettinum leiti út fyrir að allt myndi heppnast. Kolbeinn fór niður. Veðrið var dramatískt, hellirigning, þrumur og eldingar. En eftir 50 til 100 metra var Kolbeinn búinn að fá nóg og breytti yfir í stökk.

Endanleg úrslit voru ekki komin á vef NM2008 þegar þetta var ritað.

Mynd: Guðmundur Einarsson á Sprota frá Sjávarborg.

LH-Hestar/Jens Einarsson