Íslandsmót í hestaíþróttum og áhugamannamót Íslands 2024 auglýst til umsóknar

Íslandsmót fullorðinna og ungmenna, Íslandsmót barna- og unglinga og Áhugamannamót Íslands árið 2024 eru auglýst til umsóknar fyrir áhugasama og metnaðarfulla mótshaldara. Íslandsmótin og áhugamannamót Íslands eru meðal hápunkta keppnisársins á Íslandi.

Dagsetningar mótanna eru eftirfarandi:

• Íslandsmót barna og unglinga 18. til 21. júlí
• Áhugamannamót Íslands 9. til 11. ágúst
• Íslandsmót fullorðinna og ungmenna 22. til 25. ágúst

Á Íslandsmóti fullorðinna og ungmenna skal keppt í einum styrkleikaflokki í hvorum flokki fyrir sig, keppt í greinum þar sem keppendur eru einir inni á vellinum í einu, en það eru V1, F1, T1, T2 ásamt skeiðgreinum, PP1, P1, P2 og P3. Auk þess er keppt í gæðingalist sem á liðnu ársþingi kom undir regluverk mótahalds LH. Þátttökurétt hafa pör sem á keppnisárinu hafa náð lágmarkseinkunn í hverri grein, og það er keppnisnefnd LH sem gefur út lágmörkin í febrúar.

Þátttökuréttur á Íslandsmóti barna og unglinga er opinn öllum keppendum þessara flokka og keppt skal í eftirfarandi greinum:
Börn: V2, T3, T4 og gæðingalist. 
Unglingar: V1, T1, F2, T4, gæðingalist og skeiðgreinar.

Á Áhugamannamóti Íslands skal keppt í einum styrkleikaflokki, 1. flokki, og keppnisgreinar eru T3, T4, T7, F2, V2, V5, gæðingaskeið, 100m. skeið, ásamt A-flokki og B-flokki gæðinga. Þátttökurétt á Áhugamannamóti Íslands hafa allir sem náð hafa 22 ára aldri á keppnisárinu og hafa ekki keppt í meistaraflokki í íþóttakeppni á síðastliðnum 5 árum.

Mótshöldurum er heimilt að bjóða upp á fleiri greinar kjósi þeir svo, sem og sýningargreinar en í sýningargreinum skal ekki krýna Íslandsmeistara.

Umsóknir áhugasamra mótshaldara skulu berast Landssambandi hestamannafélaga fyrir 1. október nk.

lh@lhhestar.is