Lið Líflands sigraði í Survive Iceland

Þolreiðarkeppni LH, Survive Iceland 2022, lauk í dag á Rjúpnavöllum. Úrslit fóru þannig að lið Líflands með Hermann Árnason í hnakknum bar sigur úr býtum með heildartímann 14 klst. og 11 mín. Í öðru sæti varð lið H. Hestaferða með tímann 14 klst. og 26 mín., knapi Emelie Sellberg og í þriðja sæti varð lið Eldhesta með tímann 14 klst. og 47 mín. með knapann Sigurjón Bjarnason. Sigurjón hlaut einnig verðlaun sem knapi mótsins ásamt Sami Browneller en þau hlutu fæst refsistig en Sami reið fyrir lið Tamangur/Hestalands.

Hestur mótsins var valinn Karel frá Stóru-Heiði úr liði H. Hestaferða, en hann fékk engin refsistig fyrir púls eða áverka og var fyrstur í mark á öllum þremur áföngunum sem hann fór. Karel er 12 vetra klárhestur undan Skýr frá Skálakoti og Íris frá Stóru-Heiði og knapi á honum var Svíinn Emelie Sellberg.

Á lokadeginum var fyrri áfangi dagsins frá Landmannahelli um Dyngjuskarð, vestur með Dyngjum og aftur að Landmannahelli um Laufdalsskarð, alls um 31 km. Seinni áfangi dagsins var frá Helliskvísl að Rjúpnavöllum, alls um 31 km.

Að lokinni keppni fór svo fram dýralæknaskoðun að vanda ásamt álagsskoðun MAST.

Þessi fyrsta opinbera þolreiðarkeppni þótti takast vel og gaf mótshöldurum dýrmæta reynslu til að þróa og bæta keppnisreglurnar enn frekar.