Á laugardagskvöldið héldum við Léttismenn vel lukkaðan afmælisfagnað. Þar var vel mætt og áttu menn góða kvöldstund saman. Boðið var upp á góðan mat, frábær skemmtiatriði og rúsínan í pylsuendanum var magadansmær sem tók nokkra félagsmenn í magadanskennslu. Þetta vakti mikla kátínu meðal annarra gesta.

Fyrsta mót ársins hjá Létti, og líklega fyrsta hestamót ársins á landinu, fór fram á föstudaginn og var það hið svokallaða Nýárstölt Léttis.

Það mun sennilega standa í mörgum að leigja sér pláss fyrir reiðhestinn sinn i vetur. Básinn á höfuðborgarsvæðinu með spæni, fóðri og hirðingu kostar nú 30 til 35 þúsund krónur á mánuði miðað við sex mánaða innistöðu. Eða á bilinu 180 til 210 þúsund á hest.

„Ég held að þessar sölusýningar séu komnar til að vera,“ segir hinn kunni hestamaður og hrossabóndi Björn Sveinsson á Varmalæk í Skagafirði. Sölusýning var haldin í nýrri reiðhöll á Varmalæk í gær.

Kreppan er ekki ennþá komin í Hestheima. Þar reka hjónin Marteinn Hjaltested og Lea Helga Ólafsdóttir hestamiðstöð og ferðaþjónustu. Fullbókað er á járninganámskeið sem haldið verður í Hestheimum í desember og janúar.

Skaflaskeifur hafa hækkað umtalsvert í verði og kosta nú á bilinu 2000 til 3000 krónur gangurinn með sköflum. Þess skal getið að til langs tíma hafa skeifur verið fremur ódýrar og ekki hækkað í verði í samræmi við aðrar hestavörur.

Mór er nú nefndur til sögunnar sem hugsanlegur undirburður undir hesta. Mótekja var stunduð hér á landi allt fram á tuttugustu öld og þurrkaður mór notaður sem eldsneyti. Mótekja er ennþá stunduð sem atvinnuvegur víða um heim, til dæmis hjá frændum okkar á Írlandi.

Einar Ragnarsson, hestaíþróttadómari með meiru, verður yfirdómari á HM2009 í Sviss. Það verður í þriðja sinn sem Einar er yfirdómari á heimsmeistaramótum. Áður á HM2003 og HM2007.

„Spónakostnaður hjá okkur á ári liggur á bilinu þrjár til fjórar milljónir króna miðað við heils árs rekstur,“ segir Sigurður Sæmundsson á Skeiðvöllum í Landssveit. Sigurður veltir því nú fyrir sér hvort þurrkun á íslenskum mó í undirburð sé raunhæfur kostur.

Verð á tréspónum hefur rokið upp og er orðinn verulega þungur liður í rekstri tamningastöðva og í hestahaldi einstaklinga sem eru með safnstíur. Flórlæri á reiðhestum og tamningatrippum gætu því orðið með meira móti næstu misserin ef að líkum lætur.