Efnilegasti knapinn 2008 er Teitur Árnason. Hann keppti í unglingaflokki á árinu. Venjan hefur verið sú að velja þennan knapa úr ungmennaflokki, nema sterk rök styðji annað. Var það svo í þetta skiptið.

Íþróttaknapar ársins eru þeir Þorvaldur Árni Þorvaldsson og Viðar Ingólfsson. Þessir tveir kappar háðu marga hildi hvor við annan á árinu og alltaf var mjótt á munum. Þeir eru einnig vinir og félagar og þjálfa hross á sama vinnusvæði. Valnefndinni þótti ekki stætt á að skilja þá í sundur á þessum tímapunkti.

Skeiðknapi ársins er Sigurður Sigurðarson. Siggi átti mjög gott ár og kom víða við. Hann er jafnvígastur knapa um þessar mundir. Nær toppárangri hvort sem er í gæðingakeppni, íþróttakeppni, skeiðkappreiðum eða kynbótasýningum.

Gæðingaknapi ársins er Árni Björn Pálsson. Hann kom, sá og sigraði í A flokki gæðinga á LM2008 á stóðhestinum Aris frá Akureyri með 8,86 í einkunn. Árni Björn kom víðar við.

Þórður Þorgeirsson er knapi ársins 2008. Hann var verðlaunaður á Uppskeruhátíð hestamanan á Broadway í gær, laugardaginn 8. nóvember. Hann er einnig kynbótaknapi ársins 2008.

Öll hestamannafélög í LH skulu eftirleiðis skrá félagatal sitt í FELIX, sem er skráningarkerfi ÍSÍ. Flestöll hestamannafélögin hafa þegar tekið FELIX í sína þjónustu en nú er það sem sagt orðin skylda.

Knapar í úrslitakeppni í A flokki þurfa framvegis að vanda sig meira á brokki en hingað til. Samþykkt var tillaga keppnisnefndar LH sem felur í sér breytingar á reglum þar að lútandi. Tillagan er byggð á tillögu frá Fáki sama efnis.

Fulltrúar á 56. landsþingi LH voru ekki tilbúnir til að samþykkja tillögu frá Gusti um að skylda alla knapa á löglegum mótum hestamannafélaganna innan LH til að nota félagsjakka [félagsbúninga]. Helstu mótrökin voru að félagsbúningar væru dýrir.

Hestamannafélagið Léttir á Akureyri hélt upp á áttræðis afmæli sitt þann fimmta nóvember síðastliðinn. Boðið var upp á kaffi og kökur í hinni nýju reiðhöll félagsins og börnum leyft að fara á hestbak.

Fimm ræktunarbú eru tilnefnd til ræktunarverðlauna Hrossaræktarsamtaka Eyfirðinga og Þingeyinga. Verðlaun verða veitt á haustfundi HEÞ sem verður haldinn í Funaborg á Melgerðismelum 3. desember.