Jens Einarsson: Árangur Íslendinga á HM09 er allgóður, þótt hann sé ekki jafn glæsilegur og stundum áður. Ef eingöngu er tekið Sportið, þá er staðan sú að í fullorðinsflokki unnust fjögur gull, fjögur silfur og eitt brons. Eftirsóttustu verðlaunin, Tölthornið, kom í hlut Íslendinga.

21.-23. ágúst verður haldið mikið mót á Melgerðismelum. Þar verður gæðingakeppni í öllum flokkum, töltkeppni og kappreiðar með öllum skeiðgreinum og 300 m stökki og brokki. Peningaverðlaun verða í töltkeppni og kappreiðum.

Jóhann R. Skúlason og Hvinur frá Holtsmúla eru heimsmeistarar í tölti. Jóhann og Hvinur stóðu efstir eftir forkeppnina með 8,43 í einkunn. Í A-úrslitum bættu þeir um betur, hlutu hvorki meira né minna en 8,78 í einkunn og stóðu þar með langefstir. Þar með var það ljóst að tölthornið var á leið heim aftur eftir stutta dvöl í Noregi.

Þjóðverjarnir Lena Trappe og Vaskur von Lindenhof eru öruggir heimsmeistarar í fjórgangi. Lena og Vaskur stóðu efst eftir forkeppnina og héldu yfirburðum sínum í A-úrslitunum sem skilaði þeim heimsmeistaratitlinum.

Stian Petersen og Tindur frá Varmalæk eru heimsmeistara í fimmgangi 2009 en þeir keppa fyrir Noreg. Stian og Tindur fóru lengri leiðina að titlinum en þeir enduðu í 9.sæti eftir forkeppnina, sigruðu B-úrslitin, mættu feikna sterkir til leiks í A-úrslitum og uppskáru heimsmeistaratitilinn.

Danmörk náði gullinu í 100m fljúgandi skeiði á Heimsmeistaramóti íslenska hestsins. Það var Tania H. Olsen og Sólon frá Strö sem náðu besta tímanum, 7.44 sek. Jafnir í 2.-3. sæti, á tímanum 7.47 sek, voru Íslendingarnir Bergþór Eggertsson á Lótus og Valdimar Bergstað á Oríon.

Jens Einarsson: Yfirlitssýningum kynbótahrossa er lokið á HM09. Allmörg hross bættu einkunn sína dálítið. Bræðurnir frá Dal í Danmörku, synir Svöni frá Neðra-Ási, eru enn á toppnum og Kvika frá Forstwald er þriðja efsta kynbótahrossið og efst hryssna. Magnús frá Dal er hæstur bæði í aðaleinkunn og fyrir hæfileika. Knapi á honum var Agnar Snorri Stefánsson.

Jens Einarsson: Þórarinn Eymundsson á Krafti frá Bringu fékk sárabót þegar hann komst í B úrslit í tölti eftir úrfall annarra keppenda. Hann nýtti tækifærið vel og vann slaginn. Hann mun því keppa í A úrslitum á morgun og er til alls líklegur. Yoni Blom, Hollandi á Týrson frá Saringhof vann B úrslit í slaktaumatölti og þar með farmiðann upp í toppslaginn.

Jens Einarsson: Tveir hestar bættust í hóp vekringa undir 23,0 sekúndum í rigningunni í dag. Malu Logan, Danmörku, á Skyggni frá Stóru-Ökrum, Galsasyni frá Sauðárkróki, fór á 22,28 sekúndum og skaust upp í sjötta sæti. Thomas Haag, Sviss, á Risa frá Schloß Neubronn hljóp á 22.79 sekúndum og er í ellefta sæti.

Jens Einarsson Veðurspáin frá því í gær rættist og það rúmlega. Þrumur og eldingar – og þvílík úrhellis rigning að annað eins hafa Íslendingar varla séð. Jafnvel ekki þeir sem aldir eru upp á Suð-Austurlandi. Á nokkrum mínútum flóði mótssvæðið á HM í vatni. Lækir runnu eftir keppnisvöllum og áin, sem var yndisleg lítil spræna í gær, varð að mórauðu fljóti á svipstundu.