Á morgun, fimmtudag, fer fram fyrsta mótið í Meistaradeild VÍS 2009. Fyrsta grein mótsins er Smali og hefst keppni klukkan 19:30 í Ölfushöllinni. Enn er hægt að tryggja sér ársmiða í Líflandi, Top Reiter og Baldvini og Þorvaldi. Verðið á ársmiða er kr 5.000,-  en aðgangseyrir á hvert mót er kr 1.500,-

Greinilegt er að ný reiðhöll Léttismanna á Akureyri hefur gjörbreytt hestamennskunni á svæðinu. Alla vega hvað vetrarstarfið varðar. Fjölbreytt námskeið eru nú í boði og hver sýningin innanhúss rekur aðra.

Árlegir kynbótadómar og folaldasýning verður haldin í Andvara laugardaginn 7. febrúar. Kristinn Hugason, fyrrverandi hrossaræktarráðunautur, mun að venju dæma hrossin og gefa leiðbeiningar.

Knapar og hestar í Meistaradeild VÍS fengu heltur betur kalt bað við setningu deildarinnar, sem fram fór á Tjörninni í Reykjavík. Tíu til fimmtán hestar lentu í vök þegar ísinn brotnaði undan þeim.

Helluskeifur hleyptu heimdraganum fyrir ári síðan og er fyrirtækið nú með aðsetur í Stykkishólmi. Eigendur eru Agnar Jónasson og Svala Jónsdóttir. Hellurskeifur bjóða nú skaflaskeifur á hagstæðu verði.

Stjórn LH heldur vinnufund á Blönduósi um næstu helgi. Í tengslum við fundinn er hestamönnum í Húnaþingi, Skagafirði og Siglufirði boðið til almenns fundar næstkomandi föstudag, 6. febrúar, í reiðhöllinni Arnargerði á Blönduósi.

Á morgun, þriðjudaginn 3. febrúar klukkan 14:00 verður haldinn blaðamannafundur blaðamannafundur fyrir Meistaradeild VÍS í hestaíþróttum í Tjarnarkaffi í Ráðhúsi Reykjavíkur. Strax á eftir munu knapar í Meistaradeild VÍS sýna gæðinga á Tjörninni í Reykjavík til kynningar á deildinni. Kynningin mun fara fram á ísnum næst Tjarnargötunni. Að sýningu lokinni mun fara fram blaðamannafundur.

„Við hjá LH erum alltaf tilbúin til ræða málin,“ segir Sigurður Ævarsson, formaður keppnisnefndar og stjórnarmaður í LH. „Við höfum verið að kynna gæðingakeppnina erlendis undanfarin ár. Viðtökurnar eru ekki eins eindregnar og við bjuggumst við.“

Hið vinsæla ístöltsmót kvenna „Svellkaldar konur“ verður haldið í skautahöllinni í Laugardal í Reykjavík laugardaginn 28. febrúar. Að þessu sinni verður boðið upp á keppni í þremur flokkum. Ekki verður boðið upp á yngri flokk þar sem sérstakt æskulýðsmót á ís mun fara fram á sama stað laugardaginn 7. mars.