Fjölmenni var á fundi Guðlaugs Antonssonar, hrossaræktarráðunauts, og Kristins Guðnasonar, formanns fagráðs og Félags hrossabænda, í Þingborg í gærkvöldi. Heitasta umræðuefnið voru hugmyndir um að færa dóma á kynbótahrossum inn á gæðingavöll. Gunnar Arnarson, hrossaræktandi á Auðsholtshjáleigu, varar við þeim breytingum og segist sjá í þeim margar hættur.

Út er komin DVD mynd í tvöföldu hulstri á tveimur DVD diskum, samtals þrír og hálfur klukkutími af því besta frá Landsmóti hestamanna sem fram fór á Gaddstaðaflötum dagana 30. júní til 6 júlí 2008. Sýnt er frá setningu mótsins og öllum úrslitum, A og B úrslitum í öllum flokkum og eru þau í rauntíma.

Föstudaginn 13. mars mun Meistaradeild UMFÍ hefja sig til flugs í Rangárhöllinni, með keppni í fimmgangi og slaktaumatölti.  Hefst keppnin kl. 17:00 og mun standa yfir fram á kvöldið.  Mikil spenna er i unga fólkinu og verður gaman að sjá knapa og hestakost hjá þeim. UMFÍ býður alla velkomna, aðgangur er ókeypis.  Veitingar eru á staðnum á vegum Rangárhallarinnar. Keppt verður í fimmgangi og T2 og hefst keppni kl: 17:00 í Rangárhöllinni. Rásröð er eftirfarandi:

Fyrirhugað fjörumót Snæfellings sem halda átti næstkomandi laugardag fellur niður vegna þess að aðstæður á vettvangi eru ekki hagstæðar, ótraustur ís á lækjum sem þarf að fara yfir, auk klakahröngls á fjörum.  Kannað verður með að halda þetta mót síðar þegar betur viðrar. Nefndin.

Þá fer að líða að annari umferð svarfdælsku mótaraðarinnar. Mótið verður með sama sniði og fyrsta umferð. Keppt verður í opnum flokki í tölti og fjórgangi, tölti og þrígangi hjá unglingum og þrígangi hjá börnum. Mótið verður haldið 19. mars og hefst kl 20:00 í Hringsholti.

Um hvað tókust þeir á, Þorkell Bjarnason, hrossaræktarráðurnautur, og Sveinn Guðmundsson, hrossaræktarmaður á Sauðárkróki? Á ráðstefnu um Sauðárkrókshrossin, sem haldin verður á Sauðárkróki laugardaginn 21. mars, mun Bjarni Þorkelsson á Þóroddsstöðum rýna í samskipti og átök þessara stórskipa í íslenskri hrossaræktarsögu.

Opinn fundur á vegum Félags hrossabænda og Bændasamtaka Íslands um málefni hrossaræktarinnar verður haldinn í Þingborg í kvöld  11. mars kl. 20:30.

Af gefnu tilefni skal vekja athygli á því að á Landsþingi LH 2008 á Kirkjubæjarklaustri var samþykkt breyting á reglum um skeifur (grein 8.1.4.3.) Samkvæmt henni skal keppandi hægja niður á fet og ljúka keppni þannig. Á Ís-Landsmóti á Svínavatni, sem haldið var um síðustu helgi, reið Sigurður Sigurðarson á tölti eftir að hestur hans hafði misst undan sér skeifu. Hann var þó ekki dæmdur úr leik.

Þær breytingar urðu nú um helgina á liði Top Reiter að Páll Bragi Hólmarsson hefur hætt keppni í Meistaradeild VÍS. Í stað hans kemur inn varaknapi liðsins Guðmundur Björgvinsson. Guðmundur er flestum hestamönnum vel kunnugur en hann hefur tekið þátt í keppni og kynbótasýningum í mörg ár.

Safn ljósmynda frá Svínavatni er komið á www.lhhestar.is. Smelltu á "Ljósmyndir" hér til vinstri á síðunni og þá koma upp flokkar ljósmynda sem hægt er að velja úr. Ljósmyndari er Jens Einarsson: frettir@lhhestar.is